
遍知贝玛嘎波大师教言集PK24དཔལ་འབྲུག་པའི་འཁྲུངས་རབས་རིམ་པར་བྱོན་པ་རྣམས་ལ་བསྟོད་པ་ཕུན་ཚོགས་ནོར་བུའི་དོ་ཤལ་ཞེས་བྱ་བ།
4-166
༄༅། །དཔལ་འབྲུག་པའི་འཁྲུངས་རབས་རིམ་པར་བྱོན་པ་རྣམས་ལ་བསྟོད་པ་ཕུན་ཚོགས་ནོར་བུའི་དོ་ཤལ་ཞེས་བྱ་བ།
༄༅། །དཔལ་འབྲུག་པའི་འཁྲུངས་རབས་རིམ་པར་བྱོན་པ་རྣམས་ལ་བསྟོད་པ་ཕུན་ཚོགས་ནོར་བུའི་དོ་ཤལ་ཞེས་བྱ་བ་བཞུགསོ།། ༄།།ཕུན་སུམ་ཚོགས་པ་རྒྱ་མཚོའི་རྣམ་རོལ་གྱིས། །ཡིད་ཅན་ཀུན་ལ་ཕན་བདེའི་མཆོག་སྦྱིན་མཁན། །ཚེ་དཔག་མེད་པའི་སྲས་ཀྱི་ཐུ་བོ་པ། །འཇིག་རྟེན་དབང་ཕྱུག་ཞབས་ལ་གསོལ་བ་འདེབས། ། ཤམྦྷ་ལ་ཡི་རྒྱལ་ཁབ་སེང་གེའི་ཁྲིར། །དཔལ་ལྡན་རྒྱུད་ཀྱི་རྒྱས་འགྲེལ་བྱེད་པ་པོ། །ཟས་གཙང་སྲས་ཀྱི་ལུང་བསྟན་པད་དཀར་འཛིན། །རིགས་ལྡན་དབང་པོ་གཉིས་པར། བོད་འབངས་ཀུན་ལ་ཐུགས་རྗེའི་དབང་གྱུར་པས། །ཐུབ་པའི་རིང་ལུགས་ལྷ་མིས་མཆོད་པའི་སྲོལ། །དང་པོར་བསྟོད་པའི་བཀའ་དྲིན་ཟླ་མེད་པ། །སྤྲུལ་པའི་ཆོས་ཀྱི་རྒྱལ་པོར། ཟབ་མོ་ལྟ་བས་ཞི་བའི་མཚོར་འཁྲུངས་ཤིང་། །ཟབ་རྒྱས་ཆོས་ཕུང་བྱེ་བའི་ཆུ་རླུང་གིས། །གདོང་དམར་ཅན་གྱི་ནང་གི་གདུང་སེལ་མཁན། །ཤནྟ་རཀྵི་ཏ་ལ། ཕྱི་ནང་ཤེས་བྱའི་འཛིན་མ་མ་ལུས་པར། །མི་རྗེད་གཟུངས་ཀྱི་འཁོར་ལོར་ལེགས་བསྒྱུར་བས། །
4-167
ཕས་ཀྱི་རྒོལ་བའི་ཕྱོགས་ལས་རྣམ་རྒྱལ་བའི། །པན་ཆེན་ན་རོ་ཏ་པར། དུས་གསུམ་རྒྱལ་བ་ཀུན་གྱི་འཕྲིན་ལས་པར། །རྫོགས་པའི་སངས་རྒྱས་ཉིད་ཀྱིས་ལུང་བསྟན་པའི། །ཤནྟི་རི་བོར་དག་པའི་བསམ་གཏན་པ། །རྗེ་བཙུན་ཟླ་འོད་གཞོན་ནུར། །གངས་རིའི་མགུལ་དུ་རྡོ་རྗེའི་གདན་བཀོད་ལ། །གྲུབ་པ་སངས་རྒྱས་སྟོང་གི་རྣམ་རོལ་པ། ལུས་ཅན་དཔྱད་ཀྱི་སྐལ་བ་བཟང་མཛད་པ། །འགྲོ་བའི་མགོན་པོ་འབྲུག་པར། ཤར་ཕྱོགས་མངོན་པར་དགའ་བའི་ཞིང་ཁམས་སུ། །སྒྱུ་འཕྲུལ་རྡོ་རྗེའི་སྣང་བ་རབ་འབྱམས་རྩེར། །བྱང་ཆུབ་སྤྱོད་པ་རྒྱ་མཚོ་སྟོན་བྱེད་པའི།།སྣང་བ་རྡུལ་བྲལ་སེམས་དཔར། བརྒྱད་ཁྲི་བཞི་སྟོང་ཆོས་ཀྱི་སྒོར་སྦས་པ། །ཀུན་དགའ་དཔལ་འབྱོར་སྐལ་བཟང་གདུལ་བྱ་ལ། །ཅི་དགར་འགྱེད་པའི་མཚུངས་མེད་ལོ་ཙ་བ། ། རྒྱལ་བ་ཀུན་གྱི་དབང་པོར། ལྷོ་ཕྱོགས་ནོར་འཛིན་ཆོས་ཀྱིས་སྐྱོང་བའི་དབང་། །མ་སྨད་གྲགས་པའི་གཏེར་གྱུར་སྙིགས་དུས་འདིར། །ཡང་དག་ལམ་གྱི་ས་མཁན་མཆོག་གཅིག་པུ། །གོང་མ་གྲུབ་པའི་རྗེ་བོར། འཇམ་མགོན་ཞབས་ཟུང་ཉིན་མོའི་ཁུ་བ་ལ། ། ལན་བརྒྱར་འཐུངས་པའི་པདྨ་དཀར་པོའི་འཕྲེང་། །དྲེགས་ལྡན་ཀུན་གྱི་རལ་པའི་རྒྱན་གྱུར་པའི། ། མཚུངས་མེད་བླ་མ་མཆོག་དེར་གསོལ་བ་འདེབས། །སྔོན་བྱོན་རྒྱལ་བ་ཀུན་གྱི་སྤྲུལ་པའི་གཞི། །མ་བྱོན་རྒྱལ་བ་རྣམས་ཀྱི་འབྱུང་ཁུངས་པ། །ད་ལྟའི་སྐྱོབ་པ་དག་དང་དབྱེར་མེད་པའི། །
4-168
ཆོས་ཀྱི་རྒྱལ་པོའི་ཞབས། དཔག་མེད་གདུལ་བྱའི་བསམ་པ་ཅིག་ཅར་དུ། །ངེས་གསང་ཆོས་ཀྱི་བདུད་རྩིས་ཚིམས་པའི་མཐུ། །རྒྱལ་བའི་དབང་པོ་ཉིད་དད་དབྱེར་མེད་པའི། །ཐུབ་བསྟན་ཡོངས་འདུལ་དཔལ་དེར་གསོལ་བ་འདེབས། །རྒྱལ་དབང་མཐུ་སྟོབས་མཆོག་གི་ཉི་འོད་ཀྱིས། །དད་གསུམ་འདབ་སྟོང་བཞད་པའི་གེ་སར་རྩེར། །སྨིན་གྲོལ་སྦྲང་རྩིའི་འབྱུང་ཁུངས་ཉིད་གྱུར་པ། །མཆོག་གི་དཔལ་ལྡན་བླ་མར་གསོལ་བ་འདེབས། །དེ་ལྟར་གསོལ་བ་གཏབ་པའི་མཐུ་སྟོབས་ཀྱིས། །བདག་དང་མཐའ་ཡས་འགྲོ་བ་མ་ལུས་པ། །མགོན་ཁྱེད་མཉེས་བྱས་གང་གི་རིང་ལུགས་ཀྱིས། །རྫོགས་པའི་བྱང་ཆུབ་མྱུར་དུ་ཐོབ་གྱུར་ཅིག། །། འཇིག་རྟེན་དབང་པོ་སྤྱན་རས་གཟིགས། །དགེ་སློང་ཚུལ་གཟུང་པདྨ་དཀར་། །གངས་ཅན་འགྲོ་བའི་སྐྱབས་དམ་པར། ། སྙིང་ནས་དད་པས་གསོལ་བ་འདེབས། །འཆད་རྩོད་རྩོམ་ལ་མི་འཇིགས་པའི། །ཕྱོགས་ལས་རྣམ་རྒྱལ་པཎྜི་ཏ། །སྟོན་པའི་རྒྱལ་ཚབ་ཆོས་ཀྱི་རྗེ། །དབལ་ལྡན་འབྲུག་པར་གསོལ་བ་འདེབས། །གདུལ་བྱ་རྒྱ་མཚོའི་མོས་པ་རྣམས། །འཕྲིན་ལས་རྒྱ་མཚོས་འདུལ་བ་ལ། །རྣམ་ཐར་རྒྱ་མཚོར་སྟོན་བཞིན་པར། །བསྐལ་པ་རྒྱ་མཚོར་བཞུགས་གྱུར་ཅིག། །། བདེ་གཤེགས་སྟོན་པའི་བསྟན་པ་མཆོག་གི་མཚོ། །སྙན་པའི་འབྲུག་སྒྲ་སྒྲོག་པའི་སྤྲིན་འཕྲེང་གིས། །བཤད་སྒྲུབ་ཆར་གྱིས་ཉིན་བཞིན་རྣམ་སྤེལ་བ། །ཡངས་པའི་རྒྱལ་ཁམས་ཐམས་ཅད་གང་གྱུར་ཅིག །སྡོམ་གསུམ་ཉིན་བོའི་འོད་དང་རྟག་འགྲོགས་ཤིང་། །
4-169
ཐོས་བསམ་སྒོམ་པའི་དྲི་བཟང་འཛིན་པའི་དཔྱིད། །བསྟན་འཛིན་པདྨོའི་གཙོ་བོ་ཅི་ཡང་གིས། །ཡངས་པའི་རྒྱལ་ཁམས་ཐམས་ཅད་གང་གྱུར་ཅིག །སྙེད་དང་བསྐུར་སྟིའི་ཆུ་ཀླུང་རྣམས་འབབ་ཅིང་། །ཕན་དང་བདེ་བའི་རིན་ཆེན་སྐྱེ་བའི་གནས། །ཆོས་འཁོར་གསར་པ་གསར་པའི་དཔལ་རྒྱ་མཚོས། །ཡངས་པའི་རྒྱལ་ཁམས་ཐམས་ཅད་གང་གྱུར་ཅིག །སརྦ་མངྒལཾ༎ །།


目录
དཔལ་འབྲུག་པའི་འཁྲུངས་རབས་རིམ་པར་བྱོན་པ་རྣམས་ལ་བསྟོད་པ་ཕུན་ཚོགས་ནོར་བུའི་དོ་ཤལ་ཞེས་བྱ་བ།